Кезіндегі Назарбаевтың «Қазақ халқының тарихында ұялатын ештеңе жоқ» деген сөзі – шындық. Қанды соғыстан көз ашпаған ел деп көрсетсек де, өзгеден ұялатындай жайттары тарихымызда болған емес.
Дегенмен тікелей болмаса да, жанама әлемдік қауымдастық алдында да, келешек ұрпақтың алдында да ұятты болатын жайттар бар.
Мысалы кеше – Молотов-Риббентроп шартына қол қойылған күн. Осы күні , яғни 1939 жылы 23 тамызда КСРО-ның әлем алдына масқара болуының алғышарты жасалды.Себебі осы шарт бойынша фашизм мен коммунизм бірігіп, Еуропаны оккупант ретінде бөлісіп алуды ойластырған еді.
Көп кешікпей бір Польшаны екі бірдей басқыншы ел бөлісіп алды. Бір жылдан кейін Финляндияға шабуыл жасаған КСРО финдердің қорғанысын үш ай дегенде әрең бұзып, оларды тиімсіз келісімге отырғызады.Осыдан кейін әлемдік қауымдастық КСРО-ны басқыншы деп қабылдап, Ұлттар Лигасынан (қазіргі БҰҰ баламасы) шығарып тастайды.
Бұның бәрі нені білдіреді, кезіндегі коммунистер мен фашизмнің көрінісі мен іс-әрекеті бірдей екенін көрсетпей ме?!Біз тарихымызда бір нәрседен ұялсақ, осы КСРО-ның құрамында болып, жоғарыда айтылған қылмыстылардың арасында болғанымыз. Өйткені КОММУНИСТТЕР әлі де төрде, ПАРЛАМЕНТІМІЗДЕ отыр ғой.
Құдайға шүкір, тәуелсіздік алысымен ядролық қарудан бас тарттық, бүкіл әлемге бейбіт ел екенімізге сендіре алдық. Біз сол халықтар түрмесінен Тәуелсіздік алған ел екенімізді, олардың кесірінен жазықсыз жапа шеккен ұлт екенімізді болашақ ұрпаққа түсіндіре алсақ жақсы.
Әйтпесе әлі күнге КСРО біздің тарихымыз, бас тарта алмаймыз, ол болмасақ дамымайтын едік деген керітартпа пікірлер келешекте де өмір сүрер болса, келер ұрпаққа масқара боларымыз даусыз.
