Бұл сұраққа көп адам бірден “жоқ” деп жауап береді. Себебі олар “ер мен әйелдің арасында міндетті түрде сезім оянады” деген түсінікке сүйенеді. Бірақ бұл – ұғымдарды шатастырудан туған жаңсақ пікір.
Өткенде «Ұғымдарды шатастыру: Достық қарым-қатынас па, сезім бе?» деген пост жаздым ғой. Бұл соның логикалық жалғасы секілді. Қазір оқып отырған ойды түсіну үшін, сол постты оқу керек шығар.
Біріншіден, адамдар махаббат пен жыныстық тартымдылықты жиі шатастырады. Біреуге қызығу, сырт келбетіне елігу, бірге болғың келуі – махаббат емес. Ол жай ғана физикалық тартымдылық болуы мүмкін. Ал махаббаттың өзегі – сенім, құрмет, жан дүниенің үндестігі. Достық та осының негізінде құрылады. Сондықтан біреуге тартыла тұра, оны дос көру – парадокс емес.
Екіншіден, “дос болса, бірге жатпайды”, “төсекте жатса, достық бітеді” деген секілді пікірлер – шектеулі ойлаудың нәтижесі. Төсекте жату – жақындықтың бір түрі ғана. Ал достық – не жаттың, не жатпадың деген өлшеммен өлшенбейді. Шын достық кейде романтикалық қарым-қатынастан кейін де жалғаса береді. Кейбір жұптар ажырасып кетсе де, бір-біріне дос ретінде қарап, өмір бойы араласып жатады.
Үшіншіден, сезімнің тууы – адамдық. Біреуге бауыр басып кету, ұнатып қалу – достыққа жат нәрсе емес. Бірақ әр сезім әрекетке айналуы міндет емес. Біреуді жақсы көру мен бірге болуды қалау – екі бөлек нәрсе. Көп жағдайда адам ішкі құндылықтары мен қарым-қатынастың мәнін жоғары қояды да, өзіне ұнайтын адаммен дос болып қала береді. Бұл – сезімді басқарудың, өзің үшін маңызды нәрсені түсінудің көрінісі.
Соңында айтқым келетіні – қыз бен жігіт дос бола алады. Бірақ бұл – автомат емес, таңдауға негізделген нәрсе. Кей адамдар үшін жыныстық қызығушылық бәрінен бұрын тұрады, олар үшін достық деген саты болмайды. Ал кей адамдар үшін достық – ең бағалы, ең сенімді қарым-қатынас түрі. Олар үшін жыныстық тартымдылық – өткінші, ал достық – тұрақты.
Сондықтан “қыз бен жігіт дос бола ала ма?” деген сұраққа әр түрлі жауап беруге болады. Бірақ егер ұғымдарды шатастырмай, әр қарым-қатынастың табиғатын түсіне алсақ, онда мұндай достықтың өмір сүруіне ешқандай кедергі жоқ, қыз бен жігіт дос бола алады. Өйткені мәселе жыныста емес, көзқараста.
