Сонымен жыр болған тренингім өтті. Иықтан жүк түскендей, «уһ» деп дем алып, енді ес жиып отырған жай бар 🙂
Енді өзімнің жұмысыма өзім қысқаша баға беріп, сараптап алғым келіп отыр. Егер тренинг өткізгісі келген жандар, менің жұмысымнан өзіне керегін алса, қанеки!
Хош, сонымен өзіме міндетті тренинг өткізуді мойныма алғалы, ұйықтауым да қиын боп кетті. Неден бастап дайындаларымды білмеймін. Өзім мұғалім болып көргем, тренерліктен де құр алақан емеспін, бірақ осы жолы неге екені белгісіз, абыржыдым да жүрдім)
Сөзді ұзартпай, қателігім қайсы, соны айтайыншы. Қателікті ең басынан жіберіппін. Асхат Еркімбай бізге «жоспарлағанда ең әуелі нәтижені біліп алыңдар, содан кейін барып «Орындау-> Оқыту -> Мотивация» болады да, оқытқанда «Мотивация -> Оқыту -> Орындау-> Нәтиже» деген схемамен жүру керек» деген болатын. Ал мен нәтижеден басқаны жоспарлаппын)
Тағы бір қателігім, бағдарламамда «Медиа ақпараттық сауатты» кеңірек қамтығым келді. Себебі қатысушылардың көбі медиа саласындағылар болса да, нақты журналистика мамандығын бітірмегендер болатын. Сондықтан барынша көбірек таныстырып, көбірек айтқым келді. Соным қателік болды, себебі 90 минуттық бір тренингте бәрін қамту міндет емес — дағдыны дамыту. Сондықтан уақыт жеткіліксіз болды. Дегенмен 100 минуттан сәл асқаны болмаса, тым ұзаққа созбадым.
Содан кейін алғашқы тренингтерде тоқсан минуттың әр секундын пайдаланамын деп тым тыраштанып қойдым ғой деймін. Бағдарламамды тым көбейтіп жібердім. Мысалы әрбір ойынды 10 минут деп есептесең, демек 15 минут қылу керек. Себебі олар күнделікті алдыңда отыратын оқушы емес, түсіндіретінің бар, олардың ортаға шығып сабылатыны бар, т.б. қосымша минутты қосу керек.
Демек, бағдарламаң тым аз болып кетпесе де, барынша тиянақты, форс-мажорды есептеп, шағын қылу керек.
Әрине, қателіктерім туралы айтқанда, тренингім адам айтқысыз жаман болды деген сөз емес)) Олай өтсе, мен бұлай жазып отырмай, тренингі құрсын деп безіп кетер ем.
Дегенмен өз тренингіме «қанағаттанарлық» деп қана баға қояр едім. Ал қатысушылар не дейді, оны жоғарыдағы видеодан көре жатарсыздар. Бастысы алғашқы асудан өттік.
Айта кетейін, бұл тегін тренинг USAID қорының қолдауымен Интерньюс-Қазақстан өкілдігінің MediaCamp бағдарламасы аясында “Мінбер” журналистерді қолдау орталығы ұйымдастырған «Тренерлерге арналған тренинг» жобасының талабы бойынша өткен еді.
